Joan den Urriaren 2an, Kepa Apostolu deunaren parrokian, Jose Antonio Pagolak “Volver a Jesucristo. Iniciar la reacción” izenburuko itzaldia eman zigun.
Hemen sakatuz hartaz goza dezakezue.
------------------------------------------------------------------------------------------------------------------
José Antonio Pagolaren homiliak.
Igandeko izenburuan "klik" egin, José Antonio Pagolaren homiliak irakurtzeko, partekatzeko, jaisteko edo inprimatzeko. Baita ere goiko menuan A Zikloa, B Zikloa edo C Zikloa aukeratu, zikloaren homiliak irakurtzeko.
-----------------------------------------------------------------------------------------------------------
Santa Maria, Jaungoikoaren Ama (B)
EBANJELIOA
Aurkitu zituzten
Maria, Jose eta jaioberria. Jaio eta zortzi egunera, Jesus izena ezarri zioten.
+
Jesu Kristoren Ebanjelioa San Lukas liburutik
2,16-21
Joan ziren lasterka eta han aurkitu zituzten
Maria, Jose eta jaioberria askan etzana. Ikusi zutenean, haurtxo hartaz esan
zitzaiena kontatu zuten. Artzainek esandakoa entzun zuten guztiak harriturik
gelditu ziren. Mariak, berriz, gertakari guztiok
gogoan hartzen zituen, bere barruan hausnartuz.
Artzainak, entzun eta ikusi zutenarengatik Jainkoari aintzaka eta goraka
itzuli ziren, dena aingeruak esan bezala gertatu baitzitzaien.
Jaio eta zortzi egunera haurra erdaindu
zutenean, Jesus izena ezarri zioten, sortu aurretik aingeruak esan bezala.
Jaunak esana.
HOMILIA
2015eko urtarrilaren 1a
AMA GURE
BIDELAGUN
Esan ohi da gaur egungo kristauak
beste aro batzuetako fededunak baino gutxiago hunkitzen garela Andre Mariaren
aurrean. Agian, Mariaren debozioan izan diren sasi-joerak ikusita, errezelo eta
susmo askok joak gara ustekabean.
Batzuetan, bera oso bakar
harturik azpimarratu izan da Mariaren babes-eginkizuna, bere seme-alabak gaitz
orotatik anparatzen dituen Amatzat emanez, bizitza ebanjelikoa kontuan izan
gabe.
Beste batzuetan, Mariarekiko
debozio batzuek ezin izan dute goratu Maria «ama idealizatu» baten menpetasun
gaixobera sortu gabe, eta heldutasun-falta eta infantilismo erlijiosoa sustatu
gabe.
Agian, Maria «emakume bakartzat»,
besterik ez bezalakotzat, emanez egin den idealizazio honek berak elikatu ahal
izan du benetako emakumearekiko nolabaiteko mespretxua, eta horrela, behar
bada, gizonezkoaren nagusitasuna sustatu duten eragileetako bat gehiago izan
da. Gutxienez, ez genuke baztertu behar, arinki, katolikoei alde
desberdinetatik aurpegiratzen zaigun kritika hau.
Alabaina, tamalgarria izango
litzateke geure bizitza erlijiosoa pobretuko bagenu, fededunentzat Maria izan
daitekeen bezalako erregaluaz ahaztuaz.
Mariaren debozioak, zuzen
harturik, ez darama inor infantilismora; aitzitik, femeninotasunaren presentzia
aberasgarria segurtatzen du gure fede-bizitzan. Jainkoak berak emakume baten
sabelean haragitu nahi izan du. Ordudanik, esan dezakegu «Jainkoaganako eta
Jainkoagandiko bidea dela femeninotasun hori» (L. Boff).
Gizadiak beharrezkoa du beti
femeninotasunari ezartzen diogun aberastasun hori; izan ere, gizonezkoagan ere
baden arren, emakumeagan trinkotzen da era berezian: intimitatea, onarpena,
ardura, txera, samurtasuna, misterioari lotzea, haurduntza, bizia ematea.
Maria geure bizitzatik baztertzen
dugun bakoitzean, geure fedea pobretzen dugu. Eta femeninotasuna
mespretxatzean, ama baten besoetan eskaini zaigun Jainko horrengana hurbiltzeko
balizko ubideei ixten diegu geure burua.
Jainkoaren Ama Maria santuaren
jaia ospatuz hasten dugu urtea. Jainkoaren Hitzarekiko fideltasunak eta
eskaintzak, xumeekin bat egin izanak, Jesus Haurrarekiko aukerei atxiki izanak,
Eliza jaioberrian zerbitzari bizi izanak eta, ezer baino lehen, Salbatzailearen
Ama izanak gure fedearen eta esperantzaren Ama bihurtu dute Andre Maria.
José Antonio Pagola
HOMILIA
2012ko urtarrilaren 1ea
GAUR
Jesusen jaiotzaren kontakizuna
honela bukatzen du Lukasek: irakurleei adieraziz «Mariak gauza hauek guztiak bihotzean gordetzen dituela». Ez du
gordetzen gertatua, iraganeko zenbait oroitzapen bezala, baizik bere bizitza
guztian eguneratuko eta berbiziko duen esperientzia bezala.
Ez da funtsik gabeko oharpena.
Fede-eredu dugu Maria. Ebanjelari honen iritziz, Jesus Salbatzaileagan sinestea
ez da aspaldiko garai bateko gauzak gogoratzea, baizik haren indar salbatzailea gaur esperimentatzea, gure bizitza gizatarrago
egiteko gai dela esperimentatzea.
Horregatik, baliabide literario
berezi-bereziaz baliatzen da Lukas. Jesus ez da iraganeko norbait. Nahita
errepikatzen du ezen Jesus berpiztuaren
salbazioa «GAUR» berean ari zaigula eskaintzen, harekin topo egiten dugun
bakoitzean. Hona adibide batzuk.
Honela iragartzen digu Jesusen
jaiotza: «Daviden hirian Salbatzaile bat jaio zaizue gaur». Gaur ere jaio
daiteke Jesus guretzat. Gaur sar daiteke
gure bizitzan eta alda dezake betiko. Bizi berrira jaio gaitezke harekin.
Galileako herrixka batean ezindu
bat ekarri diote Jesusi. Hau hunkitu egin da, hura bekatuak blokeaturik
ikustean, eta sendatu egin du barkazioa eskainiz: «Barkatuak dituzu zeure
bekatuak». Jainkoa goratuz erreakzionatu du jendeak: «Gauza harrigarriak ikusi
ditugu gaur». Guk ere esperimenta
dezakegu barkazioa, Jainkoaren bakea eta barneko poza, Jesusi senda gaitzan
uzten badiogu.
Jeriko hirian, Jesusek Zakeoren
etxean hartu du ostatu, zerga-biltzaile aberats eta boteretsu haren etxean.
Jesusekin topo egiteak erabat eraldatu du Zakeo: hainbat jenderi lapurtua
itzuliko du eta pobreekin partekatuko bere aberastasunak. Jesusek diotso: «Gaur
salbazioa iritsi da etxe honetara». Jesusi geure bizitzan sartzen uzten
badiogu, gaur berean hasi ahal izango
dugu geuk ere biziera duin, haurride arteko eta solidario bat.
Jesus hilzorian da gurutzea, bi
gaizkileren artean. Haietako batek konfiantza hartu du Jesusengan: «Jesus,
gogora zaitez nitaz zeure erreinuan izango zarenean». Bat-batean erreakzionatu
du Jesusek: «Gaur nirekin izango zara paradisuan». Gure heriotzako ordua ere salbazio-eguna izango da. Hainbeste
espero genituen hitz hauek entzungo ditugu azkenean: hartzazu atseden, izan
konfiantza nigan, gaur nirekin izango zara, eta betiko.
Gaur urteberria hasi dugu. Baina,
zer izan daiteke guretzat zerbait berri eta on? Zeinek jaioaraziko du gugan poz
berri bat? Zein psikologok irakatsiko digu gizatasun handiagoko izaten? Ezer
gutxirako dira desio onak. Gugan
ernetzen den gauzarik hoberenerako esna bizitzea da garrantzia duena.
Egunero eskaintzen digu Jainkoak salbazioa. Ez da zertan ezeren zain egon.
«Gaur» hau bera izan daiteke niretzat salbazio-egun.
José Antonio Pagola
HOMILIA
2009eko urtarrilaren 1a
AMA GURE
BIDELAGUN
(2015ko urtarrilaren 1en homilia
ikusi)
José Antonio Pagola
José Antonio Pagola Itxaldiaren Bideoak ikusteko:
No hay comentarios:
Publicar un comentario
Iruzkinen argiltapenak blogaren administratzailaren onarpena eskatuko dute.